BACOLOD CITY, Philippines —Nangandam na ang mga kadagkoan ug ang katawhan sa Negros Occidental ilabi na sa 5th District alang sa pag-abot sa patay’ng lawas ni anhing Rep. Ignacio ‘Iggy’ Arroyo ugmang adlawa (Lunes) sa gabii.
Ang kapuyo ni Iggy nga si Grace Ibuna, igsuon si Mike Arroyo ug uban pang mga kabanay maoy gikatakdang modala sa patay’ng lawas sa kongresista.
Si Provincial Board Member Melvin Ibañez sa 5th District mibutyag nga moabot ang patay’ng lawas ni Iggy sa Bacolod Silay-Airport sa Silay City alas-6 sa gabii ug mag-caravan ang mga higala ug kabanay sa mga Arroyo pagdala niini ngadto sa lungsod sa Hinagaran .
Anha dad-on sa St. Mary Magdalene Church sugod ugma sa gabii hangtud sa adlaw’ng Huwebes sa buntag matud pang Ibañez.
Ang mga residente sa Hinigaran magdala unya og mga kandila daplin sa dalan aron sugaton ang ilang kongresista ug ubanan kini sa pagpabuto og firecrackers sumala pa ni Fr. Greg Patiño, ang kura paroko sa maong simbahan
Adunay himuong Santos nga Misa pagka-Martes sa bunta ug isunod ang necrological service nga giandam sa Department of Education sugod alas-2 hangtud sa alas-5 sa hapon ug sundan kini og concelebrated Mass pagka alas-6 sa hapon.
Pagka-adlaw’ng Huwebes dad-on ang patay’ng lawas ni Iggy sa Manila aron didto ipahiluna. Si Iggy namatay sa London tungod sa sakit nga cirrhosis niadtong Enero 26, siya napili tulo ka higayon sa 5th District isip kongresista. (BANATNEWS)