CEBU, Philippines - Si Vice President Jejomar Binay nagkanayon nga iyang agdon si Governor Gwendolyn Garcia sa desisyon niini kun mokandidato ba siya sa pagka-senador sa umaabot nga election. Mao kini tubag ni Binay sa mga pangutana sa taga media sa Sugbo kun andam ba siyang mosagop sa gobernador kun mokandidato kini pagka-senador.
Sa pagkakaron miingon si Binay nga wala pa siya masayud sa desisyon sa gobernador busa di pa siya makahatag og pintok nga tubag sa pangutana kun mosagop ba siya o dili sa gobernador. Sumala pa ni Binay nga sa pagkakaron, ang gobernador padayon pang nagtimbangtimbang sa angay niyang ipakanaog nga hukom sa iyang kaugalingon kun mokandidato ba siya sa pagka-senador o dili. Daan nang mipadayag si Binay sa iyang lakang sa pagsuporta kang Garcia kun modagan kini sa pagka-senador sa tuig 2013.
Ang pasalig gihimo ni Binay atol sa Charter Day Celebration sa siyudad sa Toledo diin sila si Binay ug Garcia maoy labing pinasidunggang dinapit.
Dugang pa sa bise presidente nga dili lisud alang sa gobernadora ang pagkasenador sanglit nakita man sa katawhan ug naila na si Gov. Garcia sa iyang daghang nahimong kalamboan hinungdan nga misulbong ang ekonomiya sa probinsiya sa Sugbo.
Gumikan niini si Binay nagkanayon sa taga media nga kun mokandidato si Garcia sa pagka-senador, andam siya sa tanang higayon sa pagtunol sa iyang suporta niini. (BANATNEWS)