CEBU, Philippines - Kritikal ang kahimtang sa duha ka mga batan-on human madasmag ang gisakyan nilang motorsiklo sa railing daplin sa karsada didto sa barangay Tapon lungsod sa Dumanjug niadtong Biyernes sa hapon.
Ang mga biktima mao si Jennel Redoble, hingkod nga taga Cansiojon, Ronda , ug si Christian Paden,15, silingan ni Redoble.
Si SPO2 Clorencio Clarion sa Dumanjug Police Station mibutyag sa Banat News nga nagsakay sa ilang motorsiklo ang mga biktima paingon ngadto sa usa ka tindahan sa utlanan sa Ronda ug Dumanjug.
Sa kakusog nga dagan sa motorsiklo misuway kini og overtake sa gisundan nilang traysikol apan wala na kapugngi niini ang sakyanan hinungdan nga imbis motarong sa pagsubay sa karsada mitipas ug misaliring kini paingon ngadto sa puthaw nga railing sa daplin sa karsada.
Busa nasalibay silang duha ug dihang mitugpa sila sa sementadong karsada nangapantok ang ilang ulo busa misagiwsiw ang dugo sa ilang ulo gumikan sa mga samad nga naangkon niini.
Ang mga biktima gihatod dayon sa mga estambay ngadto sa Barili District Hospital apan gibalhin kini sa tambalanan sa dakbayan sa Sugbo ubos sa talandugon nga kahimtang.
Matud pa sa kapolisan nga ang nagrabihan sa maong disgrasya mao si Redoble nga maoy nagmaneho sa sakyanan. (BANATNEWS)