CEBU, Philippines - Sukwahi sa milabay’ng tuig nga maglagiting ang kainit sa adlaw atol sa mga bulan sa tingbakasyon, gilauman nga makabaton og wet summer ang Kabisay-an sumala pa sa Philippine Atmospheric Geophysical and Astronomical Service Administration (Pagasa).
Si Ella Comahig sa Pagasa-Mactan mibutyag sa Banat News nga padayon pa gihapon ang La Niña ug gilauman nga adunay panagsang mga pag-ulan nga masinati bisan sa ting-init.
Sa ulahing weather bulletin ang pagtumaw sa Ridge of High Pressure Area (HPA) sa mga lugar sa Luzon ang direksiyon sa hangin mibali kini gikan sa amihanang sidlakan ngadto sa sidlakan o habagatang sidlakan.
Ang hinay-hinay nga pagsaka sa temperatura matag-adlaw nakapahinay sa hanging amihan.
Gilauman nga makabaton og init o alindanga nga panahon ang mga lugar sa nasud apan masinati ang mga pat-ak pat-ak nga uwan, panugdog ini’g ka hapon sa sidlakang bahin sa Visayas ug Mindanao.
Dunay mga panahon nga kusog nga huros sa hangin sa sidlakan ang magpasulabi ilabi na sa sidlakang bahin sa nasud inubanan sa kasarangan ngadto sa pagkabaluron sa kadagatan tungod sa pagpasulabi sa La Niña phenomenon. (BANATNEWS)