CEBU, Philippines - Naputos sa samad pinusilan ang gipasanginlang notadong kawatan pasado alas-4 sa kaadlawon kagahapon sa Tisa Hills sa barangay Tisa sa dakbayan sa Sugbu.
Ang biktima nailhan nga si Larry Morria, 30, molupyo sa sitio Angay-Angay sa maong barangay ug nakaangkon kini og upat ka samad pinusilan sa nagkadaiyang parte sa iyang lawas.
Sa pakighinabi sa Banat News ni PO3 Geoffrey Gutual sa Cebu City Police Office, Homicide Section, misaysay kini nga si PO2 Comar Cordova sa Intelligence and Detective Managemant Branch (IDMB) nakadungog sa mga buto-buto sa armas hinungdan nga iya kining gisusi.
Apan una siya miadto sa maong lugar nanawag una siya sa Punta Princesa Police Station aron mangayo og back-up.
Ang biktima wala nay kinabuhi dihang naabtan sa mga polis nga nagbuy-od sa ngiob nga dapit sa kasagbutan ug may mga samad pinusilan. Walay nakitang basiyo sa bala sa armas nga nakuha diha sa crime scene.
Matud pa ni Gutual nga ilang nakuha gikan sa lawas sa biktima ang usa ka martilyo. Midugang si Gutual nga base sa ilang nakuhang impormasyon gikan sa mga silingan sa biktima notado kining kawatan sa ilang dapit apan ang tanang alegasyon gisusi pa sa kapolisan aron pagtino kung may koneksyon ba kini sa kamatayon sa biktima.
Dugang nakuhang impormasyon sa kapolisan kalabot sa biktima nga aduna nay daghang bati nga rekord sa barangay sama sa pagpangawat ug giingong nagsulod gawas na kini sa bilanggoan tungod gihapon sa maong mga kaso.( /EIM) (BANATNEWS)