CEBU, Philippines - Sa ubang kanasoran, dugay na nilang gibuhat kining pagbahig o paglain sa mga basura dayon isulod sa sudlanang bag ug unya ihulog didto sa labing duol nga receptacles o mga sudlanang gipuwesto sa gawas sa mga pinuy-anan, diin anhi na kolektahon sa trak ang mga pinutos nga basura. Ang usa ka dako ug tag-as nga edipisyo o high-rise building didto, labihang daghana sa basura, apan di ka kakita’g naglaundok kay kasagaran aduna may kaugalingong kahimanan sama sa shredders o kanang mogaling aron pinohon ang basura ug sorters nga awtomatik nga mobahig o molain sa mga klase sa basura. Adto kini padung sa waste disposal duck, ipadagan sa dakung linya sa tubo deretso sa selyadong compartment o sa naghulat nga selyadong container van o sakyanan. Ihatud kini sa buhatan o himoanan sa produkto nga gikan sa basura. Ang uban gani, gihimong sugnod sa enerhiya.
Sa uban dapit nga may lapad kaayong basurahan apan kun tan-awon mo, morag mga factory. Kay ig-abot sa trak sa basura, ihuwad man didto sa may mga compartment o open pit nga may mga nagdagang lagpad nga conveyor sa ilawom paingon ngadto sa mga sorter o mga tawong mobahig ipamutang sa nagkalainlaing conveyor sa klase sa basura, unya igawas usa na ka recycle product.
Dinhi sa ato, inanay na kini giplano ug gi-implementar, sama sa MRF.