CEBU, Philippines - Aron nga mapatuman ang gisitar nga tax collection niining tuiga 2012, ang lalawigan sa Sugbo pinaagi sa Provincial Treasurer’s Office mipahimangno sa tanang magbubuhis sa pagbayad na sa ilang obligasyon sa tukmang panahon aron makalikay sila sa ipahamtang nga silot.
Kini ang gipalanog nga pahimangno ni Provincial Treasurer Roy Salubre human mopagawas og direktiba si Governor Gwendolyn Garcia ngadto sa mga mamumuhis nga wala makabayad og buhis sa milabay’ng tuig sa pagbayad na sa ilang obligasyon sulod sa tulo ka buwan gikan karon.
Giklaro ni Salubre nga kun mapakyas kini sa pagbayad sa ilang yuta posibling ipaubos ang ilang butang sa usa ka Auction Sale aron lang makolekta ang maong buhis.
Nasayran nga ang lalawigan sa Sugbo adunay kapin sa P2 bilyones nga Internal Revenue Allotment Fund apil na ang National Wealth collection sa tuig 2011.
Tungod niini ang lalawigan mihingusog sa pagpangolekta sa buhis: nga naglakip sa property tax revenues, sand and gravel, transfer tax, fines and penalties-local taxes, franchise tax, real estate tax collection ug uban pa. ( WC) - (BANAT NEWS)