CEBU, Philippines - Naduso na kagahapon sa mga alas 3:00 sa hapon ngadto sa piskaliya sa dakbayan sa Talisay ang kasong multiple murder batok kang Tommy Laburada Echavez ug sa iyang kauban.
Si Echavez maoy gipasanginlang gun man sa nahitabong pagpamanhig patay sa asawa ni Atty. Raul Sesbreño nga si Virginia Sesbreño ug kang Joshua Young ug Soledad Epanto.
Si Supt. Eddie Recamara, hepe sa Talisay City Police Station sa pakighinabi niini sa Banat News kagahapon mibutyag nga nakompleto na nila ang gikinahanglang dokumento sama sa affidavit sa mga paryente nila ni Virginia ug Epanto.
Apan ang habig ni Young i-apas lang nila ang mga dokumento niini tungod kay padayon pa sila sa komunikasyon sa mga paryente sa biktima kinsa gibati pa og kahadlok hangtud karon.
Matud usab sa hepe nga ang kabahin sa utok sa pagbanhig padayon sila sa pagpalawom sa ilang imbestigasyon aron mapalig-on nila ang ilang ebidensiya batok sa mastermind.
Gawas sa kasong multiple murder, si Echavez gipasakaan usab sa kapolisan sa Talisay og kasong illegal possession of firearm and explosive.
Kahinumduman nga si Echavez nakigpinusilay kini sa mga polis nga misikop kaniya ug nakuhaan og usa ka kalibre .45 nga pistola nga dunay mga buhing bala ug usa ka hand grenade.
Kagahapon sayo sa buntag gibutyag ni Cebu Provincial Police Office director Sr. Supt. Patrocinio Comendador nga hayan malangay pa nila ang pagpasaka sa maong kaso tungod kay wala pa makompleto ang dokumento sa usa sa mga biktima.
Samtang gibuhian ang gipasanginlang nanghulga kang Virginia human kini makapakita og order gikan sa korte sa pagbasura sa bench warrant batok kaniya niadtong Lunes.
Si Nestor Zapanta, kinsa usa sa naapektohan sa demolisyon diha sa lote sa mga Sesbreño sa barangay Lawaan, dakbayan sa Talisay gisikop sa kapolisan subay sa bench warrant sa kasong grave threat nga giluwatan ni Municipal Trial Court in Cities (MTCC) Judge Mario Manayon.
Apan nasuta nga si Zapanta naisyuhan na og order to quash bench warrant of arrest human nakaduso na niadto pang Pebrero 20, 2012 og Motion for Reconsideration ang abogado niini.
Si Susan Bono, clerk of court sa MTCC sa pakighinabi sa Banat News kagahapon mibutyag nga si Zapanta gipasakaan og kasong grave threat sa namatay nga asawa sa abogado nga si Virginia ug ni Jumbee Dabizon.
Gikataho nga ang maong pagpasaka og kaso dunay kalambigitan sa bangi sa yuta diin ang balay ni Zapanta kinsa naturok diha sa giangkon nga lote ni Atty. Sesbreño ang naapil sa pagka-demolish. EIM - (BANAT NEWS)