CEBU, Philippines - Gipahibalo sa kanhi mayor sa siyudad sa Sugbo ug pangulo sa partido sa oposisyon nga Kugi Uswag Sugbu (Kusug) nga si Alvin Garcia nga wala na siya’y plano pang mobalik pa sa politika karong 2013 nga piniliay.
Sa report sa TV Patrol Central Visayas kagahapon, si Garcia midugang nga wala pa pud sila makahukom kung suportahan ba nila o dili ang kandidatura ni Mayor Michael Rama sanglit magtigom pa ang iyang partido kabahin niini.
Si Rama kanhi sakop sa higpit nga kaatbang sa partido ni Garcia nga Bando Osmeña Pundok Kauswagan (BOPK) nga gipangulohan ni Kong. Tomas Osmeña nga karon kaaway na sa politika ni Rama. Sila si Garcia ug Rama susama og sitwasyon nga ilaha ra pud nga nakabangi si Kongresista Tomas Osmeña.
Hinuon pipila sa mga sakop sa Kusog ang mipadayag og pagsuporta sa liderato ni Rama naglangkob nila ni Kapitan Jerry Guardo sa Sambag 1, Kapitan Jose Navarro sa Punta Princesa ug Pastor Alcover II sa Agsungot.
Samtang gipadayag ni Rama kagahapon nga bukas siya sa bisan kinsa nga grupo nga makig-alyansa kaniya apan iyang giklaro nga wala pa siya’y pormal nga panagtigom sa mga lider sa Kusog. EIM - (BANAT NEWS)