CEBU, Philippines - Aprobado na sa konseho sa dakbayan sa Sugbo ang ordinansa bahin sa tukorong City College nga dumalahon sa kagamhanan ning siyudad.
Sumala ni Konsehal Rodrigo Abellanosa nga dako kaayo og ikatabang ang City College alang sa mga kabatan-onan nga mga kabos apan gustong makalampos sa pagtungha.
Dili pa hinuon matino kung kanus-a kini matukod sa hingpit sanglit giumol pa man sa konseho ang Implementing Rules and Regulations (IRR) alang ning maong institusyon.
Base sa maong oridinansa, ang City College mopalapad sa kursong Nursing ug uban pang mga kurso.
Lakip usab sa kurso nga kapahimuslan unya sa mga estudyante sa City College mao ang mga kursong vocational nga maoy gihugopan sa mga tinun-an karong panahona tungod kay dali ra silang makatrabaho sa gawas sa nasud.
Ang Department of Manpower Development and Placement maoy modumala sa gitawag nga skills development courses.
Aron masugdan ang pagbukas niini kinahanglan nga ang gobiyerno mogahin og P5 million.
Madugangan kining maong gahin sa higayon nga magsugod na ang operasyon sanglit mangolekta man usab ang tagdumala og ginagmay nga miscellaneous fees ug mangayo usab sila og tabang gikan sa nasudnong kagamhanan ug sa mga pribadong sektor.
Ang city treasurer maoy magsilbi nga ex-officio treasurer sa City college ug langkoban usab kini sa board of trustees nga maglakip sa mayor, ang tsirman sa committee on education sa konseho, regional director sa Commission on Higher Education, head sa Department of Education Cebu City division, provincial director sa Technical Education and Skills Development Authority ug tulo ka mga representante gikan sa pribadong sektor. - BANAT NEWS