CEBU, Philippines - Ang Cebu City Medical Center maoy napiling Most Outstanding Department karong tuiga sa Cebu City Hall atol sa pagsaulog sa ika-75 ka tuig nga Charter Day sa dakbayan.
Si Mayor Michael Rama nagkanayon nga nag-agi gyud sa hugot nga screening sa mga sakop sa selection committee gikan sa nagkalainlaing sektor ang pagpili sa labing maayong departamento sa dakbayan.
Matud pa sa mayor nga duna gyu’y dakong kalamboan ang CCMC ilabi na nga maayo na ang pagdumala niini, usa sa nakitang kalamboan ni Rama mao ang kalimpyo na sa maong tambalanan, hayag na, ug gipadak-ang pediatric ward nga dili na karon tupad sa morgue sama kaniadto.
Gipalambo na usab sa CCMC ang ilang emergency room ug gidugangan usab ang mga waiting area aron dili gubot tan-awon ang sulod sa tambalanan.
Saludo usab si Rama sa mga empleyado sa CCMC gumikan sa pag-organisar nila og fun run nga mikita ug nagamit ang kwarta sa nagkadaiya nilang mga programa alang sa kabus.
Samtang ang most outstanding department head mao ang namuno sa City civil registrar nga si Atty. Evangeline Abatayo tungod sa taas nga evaluation points sa selection committee base sa iyang performance kumparar sa uban.
Gitunol ang mga pasidungog kagabii sa Casino Español. (/EIM) (BANATNEWS)