CEBU, Philippines - Gihimakak ni Eugene Elizalde, chairman sa Personnel Selection Board sa Cebu City Hall ang tabi-tabi nga may mga dili kuno mga qualified nga mga engineer nga gi-promote sa tagsa-tagsa nila ka division.
Sumala pa ni Elizalde nga wala kini basehanan busa dili angay nga tuohan kay usa lamang kini ka intriga.
Alang kang Elizalde nga kun ang usa ka empleyado ipaubos na sa interview, kini nagpasabot nga aduna kini igong katakos, apan nataymingan lang nga adunay ubang posisyon nga usa ra’y gikinahanglan, busa ang higpit nga screening ipatuman gyud aron paghashas sa mga aplikante kinsay labing maayong laki kanila.
Nagkanayon si Elizalde nga aduna siya’y mga sakop sa PSB kinsa mipahigayon sa interview ug screening ug nagkalain-lain ang resulta ug assessment nila sa ilang mga gi-interview.
Unya ang tanan nila nga assessment ila usab nga ipadangat ngadto kang Mayor Michael Rama kinsa maoy molig-on niini.
Usa sa mga report nga migawas nga nagkanayon nga aduna kunoy gi-interview sa PSB nga dili qualified apan maoy gi-promote sa ilang posisyon. Sumala pa ni Elizalde nga wala’y basehanan ang maong tabi-tabi ug giisip niya kini nga intriga busa dili na kini angayan nga tagdon.
Nagkanayon si Elizalde nga lapad ang gihimo nila nga pang-interview ug gihimo nilang patas ang pagtratar nila sa mga empleyado sanglit ang gipangita nila mao ang katakos sa matag kawani sa pagdumala sa ilang posisyon. (BANAT NEWS)