CEBU, Philippines - Mikabat sa kapin 500 ka pamilya nga biktima sa kahadlok sa tsunami scare human sa 6.9 magnitude nga linog sa mga milabay’ng semana, mapasalamaton kaayo kang Barili Mayor Teresito “Ondo” Mariñas nga maoy mihinabang kanila.
Ang maong mga pamilya kasagaran molupyo sa barangay Japitan, usa ka baybayong lugar sa maong lungsod .
Nasayran sa Banat News nga ang maong mga molupyo nanagan ngadto sa barangay San Rafael, usa ka bukirang barangay sa Barili human mabati ang pasidaan sa kagamhanan pinaagi sa Philippine Volcanology and Seismology (Phivolcs) bahin sa tsunami alert.
Milanat og duha ka adlaw ang ilang pag-estar sa evacuation center sa bukid tungod sa kahadlok sa tsunami hinungdan nga gisuplayan sila og pagkaon, sud-an ug tubig nga mainom ug uban pa nilang panginahanglan ni Mayor Mariñas.
Nunot niini si barangay councilor Francisca Montemayor maoy nanguna sa mga bakwit nga mitunol sa ilang mga pasalamat ngadto kang Mayor Mariñas gumikan sa hinabang niining sinakong bugas alang sa maong mga molupyo nga nakurat-kuratan sa katalagman.
Ang mga molupyo nagkanayon nga kun wala pa si Mayor Mariñas hayan lunosan sila sa gutom kay si kapitan Dario Ricaplaza nga ilang kapitan sa barangay wa gyud makatunol og hinabang kanila. Gihulagway usab nila nga murag wala gyuy kuwarta ang kapitan.
“Wa gyud siyay (kapitan Ricaplaza) nahimo maypa ang mayor kay nitungas gyud didto sa evacuation center ug nihatag og ayuda pero ang among kapitan wa gyud mopakita didto,” tipik sa asoy ni kagawad Montemayor.
Hinuon gibutyag ni Mayor Mariñas nga gawas sa maong mga pamilya nga taga barangay Japitan nga namakwit tungod sa tsunami scare walay dagkung kadaot nga nasugatan sa ilang lungsod atol sa pag-igo sa nahisgutan.
Gipasabot ni Mayor Mariñas nga isip amahan sa lungsod katungdanan ug tulobagon niya ang pag-atiman dayon sa mga panginahanglan sa iyang konstituwente nga masugamak sa suliran ilabi na kun may katalagman sa palibot.
Iya usab nga giawhag ang mga kapitan sa barangay nga kun may mga molupyo nga makasugat og problema ilabi na bahin sa kalamidad, mangita gyud og paagi nga masilbihan nila kini sa kinasingkasing nga pangalagad. (BANATNEWS)