CEBU, Philippines - Hingpit na nga gibuksan sa miaging gabii ang night market sa parking lot nga nahimutang sa taas nga bahin sa bag-ong merkado publiko sa sitio Tribunal sa barangay Centro sa dakbayan sa Mandaue.
Si Market Administrator Mosulini Soliva nga nahinabi sa Banat News miingon nga mokabat sa 43 ka mga manindahay ang nagsugod na sa pagpaninda sa unang gabii sa pagbukas sa night market.
Matud pa niya ang maong gidaghanon mao ray gitugotan nga makabutang sa ilang lamesa ug mga lingkoranan ilawom sa ilang lagpad nga payong isip salimbong kun mag-uwan.
Matud pa ni Soliva nga ang gitugot nga baligya atol sa night market mao ang pagkaon sama sa barbecue, puso, painit nga sikwate nga parisan og puto maya, bibingka, budbod ug uban pa.
Gitugot usab nga ibaligya sa maong dapit ang mga ilimnon nga naglakip sa beer ug uban pang ilimnon nga makadugang sa kadasig sa mga kustomer sa paglingawlingaw pinaagi sa videoke.
Hinuon si Mosulini miingon nga hangtod lamang sa alas 4:00 sa kaadlawon itugot ang night market tungod kay sa maong oras magsugod na man usab sa pagbukas ang mga manindahay nga may mga puwesto sa sulod sa nahisgotang merkado.
Nunot niini gilauman ni Mosulini nga magkadaghan pa ang mga kustomer sa maong merkado adlaw ug gabii pinaagi sa pagsagop sa tanang sistema nga magkabig sa mga customer sa pagpamalit sa ilang panginahanglanon sa panimalay sa maong merkado. - BANAT NEWS