CEBU, Philippines - Mga suspek sa pagpatay sa tawong napalgang migimaw sa sapa nakonsensya ug mitahan sa kapolisan nga naglakip sa usa ka menor de edad.
Ang krimen nahitabo niadto pang Pebrero 5 diha sa sitio Sabana Barangay Fortaleza lungsod sa Tuburan ug nianang Pebrero 7 na nakit-an ang patay’ng lawas sa biktimang si Roel Recta, 34, molupyo sa maong lugar.
Ang mga batan-on nga mitahan sa ilang kaugalingon mao silang Marvin Potchades, 18, John Cris Bayno, ug ang usa ka 16-anyos nga batan-on.
Sa imbestigasyon sa kapolisan sa lungsod sa Tuburan nasayran nga ang mga suspetsado diha sa barangay Colonia kini aron mamalit og pagkaon apan mihapit og inom og bino sa maong lugar. Matud pa ni SPO4 Carlo Cansiko, ang chief investigator sa maong kaso ang mga suspetsado mibutyag nga samtang sila nag-inom kalit mibutho si Recta ug nanigbas.
“Iyahay kuno sila og defend sa ilang kaugalingon pinaagi sa pagpunit og bato aron paghadlok,” pasabot pa ni Cansiko sa The Freeman ang igsuong pamantalaan sa Banat News.
Apan wala gihapon mohunong si Recta hinungdan nga ang usa sa mga suspek (ang menor) nakig-ilog sa sundang niini ug dihang nadisarmahan nadunggaban kini sa menor diha sa liog.
Apan human sa menor de edad, matud ni Cansiko si Bayno na usab ang midunggab sa biktima sa tiyan ug dali silang mibiya sa maong lugar.
Duha ka adlaw ang milabay ilang nadunggan nga ang lawas ni Recta napalgan nga wala nay kinabuhi ug gani nanimaho na kini.
“Ilang konsensya grabe kuno maong pagkahibalo nila nga namatay diay nisurender sila,” matud pa ni Cansiko. (EIM) (BANATNEWS)