CEBU, Philippines - Ang naapektohang mga molupyo sa demolisyon nga gipatuman sa korte sa barangay Lawaan II ug III, dakbayan sa Talisay makapuyo sa relocation site sa kagamhanan sa dakbayan.
Si Talisay City Administrator Richel Bacaltos nga nahinabi sa Banat News mibutyag niini human moduol kang Mayor Socrates Fernandez ang mga hingtungdang molupyo ug mihangyo nga ipahunong ang demolisyon.
Apan matud ni Bacaltos nga gipasabot sa mayor ang maong mga residente nga dili siya pwedeng mobabag sa mando sa korte. Hinuon gitanyagan sa mayor ang maong mga molupyo nga adto papuy-a sa lote nga gipamalit sa siyudad isip relocation site sa mga walay yuta ug balay.
Niadtong Martes gituki sa kadagkoan sa dakbayan ang maong isyu ug gisusi na sa Local Housing Board ang lugar nga angayang papuy-an sa mga naapektahan sa demolition, matud pa ni Bacaltos.
Nasayran nga may 40 ka mga balay sa nahisgutang mga barangay ang gitakdang ipalarot sa korte kay anaa kini sa lote nga gipanag-iya ni manlalaban Raul Sesbreño.
Sa laing bahin, si Superintendent Eddie Recamara, hepe sa Talisay City Police Station mibutyag nga malinawon kaayo ang demolition sa kabalayan tungod kay gipabantayan niya pag-ayo sa iyang mga sakop nga polis sa dakbayan. - BANAT NEWS