CEBU, Philippines - Ang mga mananagat nga mitunol sa pawikan nga ilang dinakpan ngadto sa kagamhanan sa dakbayan sa Talisay gipasidunggan sa konseho sa dakbayan sa Talisay niadtong Martes atol sa ilang regular nga sesyon.
Ang mga nahisgutang mananagat mao sila si Fritzmon Cabando ug Selmo Tabar, pulos taga barangay Tanke. Sa maong dakbayan.
Nasayran nga ang maong pawikan nga usa sa mga endangered species o nagkahanaw nga klase sa may kinabuhi sa dagat, giingong nasangit sa pukot sa maong mga mananagat ug ila dayon kining gitugyan ngadto sa Fishermen Sea Ecological Care (FISECA) sa Talisay.
Si Konsehal Bernard Odilao, chairman sa committee on environment maoy nangamahan sa resolusyon sa paghatag og pasidungog kang Cabando ug Tabar.
Si Odilao mipadayag sa iyang dakung kahinangop sa gibuhat nila ni Cabando ug Tabar tungod kay talagsaon lang ang ilang mga hiyas nga nagpakita og pagpakabana sa mga may kinabuhi sa dagat nga talihanaw na. Matud sa Konsehal nga adunay ubang mananagat nga kung makadakop og mga endangered species tagoan alang sa ilang personal nga tumong.
Si Odilao midugang nga nanghinaot siya nga ang gibuhat ni Cabando ug Tabar mahimo untang sumbanan sa uban. - BANAT NEWS