DUMAGUETE CITY, Philippines— Miduaw si Presidente Benigno Simeon Aquino III sa Isla sa Negros kagahapon sa buntag ug unang giduaw niini mao ang Guihulngan City aron pagsusi sa kagrabehon sa kadaot sa 6.9 magnitude nga linog niadtong Lunes.
Si Aquino naminaw sa briefing bahin sa nagpadayong operasyon sa pagtabang sa mga biktima sa maong isla. Kauban ni Aquino sila si Assistant Secretary Manuel Quezon III, Department of Interior and Local Government (DILG) Secretary Jesse Robredo ug Department of Social Welfare and Development (DSWD) Secretary Corazon Soliman.
Sumala pa sa Provincial Disaster Risk Reduction Management Council 26 ka tawo pa ang kompirmadong patay sa tibuok Negros Oriental. Diin 12 niini sa Guilhungan, tulo sa Jimalalud, tulo sa Tayasan, tulo sa Bindoy, tulo sa La Libertad, tagsa sa Bindoy, Bais,ug Ayungon.
Si Captain Anacito Naz, ang Public Information Officer sa 302nd Brigade kinsa maoy nangulo sa relief operations nagkanayon nga 23 pa ka tawo ang missing sa barangay Planaz, Guihulngan, 42 sa barangay Solongon La Libertad nga dunay 70 ka apektadong pamilya, tulo ka taytayan ang dili na maagian sa Martilo sa La libertad; Pangaluan, Jimalalud; Tinayonan, Guihulngan nga dunay 11,576 ka apektadong pamilya, 34 ang naguba nga balay ug 89 partially damaged.
Samtang misaka usab ang danyos sa P637 milyones sa mga imprastraktura; mga taytayan P235 million Public works P55 millions kadalanan P242 millions ug patubig P105 Million.
Kagahapon ang Philippine Army maoy mihakot sa mga relief goods gikan sa C130 plane diha sa Sibulan Airport ngadto na sa BRP Hen Emilio Aguinaldo sa Dumaguete Port. Matud pa ni Naz gikan sa buhatan ni Vice-President Jejomar Binay ang hinabang nga naglakip sa 4000 botelya sa mineral water. (BANAT NEWS)