CEBU, Philippines - Giisip nga heritage tree ang mga kahoy sa dakbayan sa Mandaue nga milungtad na og 100 ka gatus ka tuig ang edad busa kinahanglang mapreserbar kini ug dili angay putlon.
Si Konsehal Jimmy Lumapas sa maong dakbayan nga nahinabi sa Banat News miingon nga ang pagdili sa pagputol sa maong kahoy gihimo human maumol ang ordinansa alang ning maong katuyoan.
Matud pa ni Lumapas nga si Bonifacio Cabahug nga maoy city agriculturist sa Mandaue maoy gitahasan sa pagpangita sa maong mga kahoy nga nagbarog pa sa dakbayan hangtod niining panahona nga may edad nang 100 ka tuig o kapin pa .
Si Lumapas kinsa maoy chairman sa committee on agriculture sa konseho sa maong dakbayan nga nahinabi sa Banat News miingon nga kasamtangang gihimo ni Cabahug ang pagpakig-alayon sa mga barangay kapitan sa 27 ka mga barangay sa dakbayan.
Kini tungod kay ang matag kapitan sa barangay maoy may kasayoran bahin sa mga kahoy nga karaan nga anaa sa ilang lugar.
Ang pagpreserbar sa maong mga kahoy himoon aron makadani og dugang mga turista sa dakbayan.
Hinuon gitataw ni Lumapas nga pangitaon na kaayo niining panahona ang mga kahoy nga may 100 ka tuig ang edad busa kinahanglang ma-preserbar kini. (BANATNEWS)