CEBU, Philippines - Gidudahang tinuyo ang nahitabong sunog sa buhatan sa Commission on Elections (Comelec) sa dakbayan sa Danao kagahapon sa alas 4:51 sa kaadlawon nga daling napawong sa mga bombero.
Nadawat sa kabomberohan ang alarma sa sunog alas 4:51 kagahapon sa kaadlawon ug kay duol ra usab kaayo kini sa ilang nahimutangan daling nakaresponde ang duha ka fire trucks. Nakontrolar kini dayon sulod lang sa usa ka minuto.
Nasuta nga nagsugod ang kalayo diha sa computer room sa maong buhatan matud pa ni Chief Inspector Ronaldo Orbeta nga maoy city fire marshal sa maong dakbayan nga nahinabi sa Banat News.
Sumala pa nga diha sa computers nabutang ang listahan sa mga bag-ong nagparehistrong mga botante.
Hinuon si Provincial Comelec Officer Marco Lionel Castillano matud pa ni Orbeta mibutyag kaniya nga adunay backup sa mga talaan sa bag-ong narehistrong botante sa maong dakbayan nga mahimo nilang ma-recover.
Si SFO1 Leopoldo Pesquera ang fire investigator sa Danao City Fire Station dihang nahinabi sa Banat News mibutyag nga lakip sa mga nasunog gawas sa computers mao ang printers ug ang aircondition unit. Gibanabanang P50 mil ang danyos sa kinatibuk-an.
Sa gihimong pakisusi sa kabomberohan usa ka basiyo sa gallon nga plastik diha sa ubos nga bahin sa aircondition unit sa gawas sa buhatan ang ilang nakit-an.
Apan wala kompirmaha ni Pesquera kun nanimaho ba o may lama sa gasolina ang gallon hangtud nga ilaha kining masumitir sa eksaminasyon. Tungod sa maong gallon dunay mitumaw nga pagdudang gituyo ang maong sunog.
Ang mga lokal nga mga opisyal sa maong dakbayan pinangulohan ni Mayor Ramon Boy Durano Jr. buot nga ipa-recall sa iyang igsuong si Bise Mayor Ramonito Durano III ug mga sakop sa konseho.
Gani si Durano miduso usab og kaugalingong gisang-at nga recall petition batok sa bise mayor ug mga konsehal apan gibasura kini sa Comelec. (BANATNEWS)