CEBU, Philippines - Nasikop sa kapolisan sa Lapulapu ang duha ka mga lalaking gipasanginlang nag-treasure hunting diha sa Sitio Iba, sa Brgy. Basak dakbayan sa Lapulapu sa milabay’ng hapon.
Ang nasikop mao sila si Lapulapu Mongala, 61, ug residente sa maong dapit ug Leofoldo Ngujo Bonghanoy, 40, ug residente sa Brgy. Subabas-bas dakbayan sa Lapulapu.
Matud pa ni SPO1 Jomar Ybañez ang nangulo sa nagpatrolyang Task Force Kalikasan dunay nakahatag kanila og impormasyon nga dunay nangubkob og bulawan sa maong dapit.
Dihang ilang gisusi ang lugar ilang naaktuhan si Mongala ug Bonghanoy nga nagpadayon sa ilang paglungag sa yuta sa maong dapit diin tulo na ka bangag ang ilang nahimo.
Aron makaginhawa sa ilawom nga bahin sa maong yuta migamit sila og compressor nga lakip sa gikompiskar sa kapolisan ug duha ka galon sa gasolina.
Ang duha gipangitaan og permit sa ilang pagpangubkob apan napakyas pagpakita niini hinungdan nga sila gidakop ug gitugyan ngadto sa City Environmental and Natural Resources Office (CENRO) sa dakbayan sa Lapulapu.
Si Mayor Paz Radaza mipadayag nga walay giluwatang permit ang siyudad alang sa mga small scale miners o sa bisan unsang operasyon sa quarrying sa siyudad. Ang duha gikatakdang pasakaan og kaso tungod sa maong treasure hunting operation. Sa report sa Buena Mano Balita sa GMA News kagahapon ang mga suspek mibutyag nga adunay mga agalong Briton nga maoy nagsugo kanila sa pagpangubkob.
Matud pa sa maong report nga gipapangita kanila sa maong langyaw ang sementadong porma og kasing-kasing diha sa ilawom nga giingong maoy tabon sa gibutangan sa mga bulawan. - BANAT NEWS