CEBU, Philippines - Namatay ang usa ka biyuda human kini dasmagi sa motorsiklo didto sa barangay Dawis Norte, sa lungsod sa Carmen niadtong Lunes sa alas 7:10 sa gabii.
Ang biktima nailhan nga mao si Jean Cascabel Norte, 63, biyuda ug nagpuyo sa maong lugar.
Samtang ang drayber sa motorsiklo nga nakadasmag kaniya mao si Restituto Lao, 28, minyo, nga taga barangay Sandayong Norte, siyudad sa Danao.
Si PO3 Roger Delan sa Carmen Police Station mibutyag sa Banat News nga ang biktima naglakaw sa karsada ug pag-abot sa maong lugar mitabok kini sa pikas daplin.
Apan wala kini makabantay sa motorsiklo nga nagpaingon kaniya kay walay headlight ang maong sakyanan.
Gumikan sa kakusog nga pagkadasmag nalagpot ang biktima ug nabunal ang ulo ug lawas niini sa karsada nga sementado.
Gihatod dayon sa mga nakasaksi ang biktima ngadto sa Danao City District Hospital diin siya mabugtoi sa kinabuhi.
Hinuon ang drayber sa motorsiklo mitahan dayon ngadto sa kapolisan ug samtang nagpaabot sa kiha, nagkagulkol karon sa prisohan. (BANAT NEWS)