CEBU, Philippines - Nakuha na kagahapon sa mga sakop sa theft and robbery section (TRS) sa Mandaue City Police Office (MCPO) ang motorsiklo ug usa ka cellphone gikan sa hideout sa mga tulisan sa barangay Sabang, dakbayan sa Danao.
Ang motorsiklo kansang tag-iya wala pa hiilhi gituohan sa kapolisan nga kinarnap usab sa grupo sa mga tulisan nga gipangulohan ni Vincent Barbero kinsa namatay atol sa pakig-engkuwentro niini batok sa kapolisan didto sa barangay Tabunok, dakbayan sa Talisay niadtong Enero 17, 2012.
Samtang ang cellphone gipanag-iya sa usa ka turista nga si Mechelle Luango, kinsa mibisita sa Sugbo atol sa miaging Sinulog.
Si Insp. Morpos miingon nga usa nila ka police asset maoy nakasugilon kanila bahin sa giingong hideout sa mga tulisan didto sa Danao.
Ang motorsiklo nga Yamaha, kolor mint-green ug itom anaa na karon sa kustodiya sa kapolisan sa Mandaue.
Ang mga kauban ni Barbero nga nagtingkagol karon sa prisohan mao sila si Ronald Dindin, Marlon Hermoso ug Justine Flores nga taga barangay Pasil sa dakbayan sa Sugbo. (BANAT NEWS)