CEBU, Philippines - Gidebuwenas unta sa sugal nga tigbakay apan gidemalas sa iyang kinabuhi ang usa ka mag-uuma human kini giingong gitabangan og patay human gitulis sa iya rang mga kabarkada niadtong Domingo sa gabii sa lungsod sa San Remegio.
Ang biktima nga si Edito Ponce, nakit-an nalang nga nagbuy-od ug patay na ug nabuak ang ulo diha sa barangay Libaong lungsod sa San Remegio niadtong Domingo sa alas 4:00 sa kaadlawon.
Matud ni SPO4 Cesar Carlos Alburo sa San Remegio Police dihang nahinabi sa Banat News mibutyag nga sayo nianang adlawa nakadaog sa tigbakay ang biktima ug nag-disko sa baylihan kauban ang dili momenos napulo ka mga lalaki.
Apan nianang pagkakaadlawon gikatahong nakit-an nalang ang biktima nga gitabangan og kulata sa pito niini ka mga kauban. Ang biktima giingong gipusposan sa ulo ug kalawasan hangtud nga kini natumba ug gibiyaan.
Patay na kini dihang nakit-an ug sa pagsusi sa mga polis wala na ang pitaka niini nga nakapaturok sa pagduda nga posibling gitulis usab kini.
Matud ni Alburo nadakpan nila ang kauban sa biktima nga sila si Dante Paduga,taga barangay Libjo sa lungsod sa Tabogon ug mitahan usab ang laing kauban niini nga si Wingel Araneta samtang gipangita ang ubang kaubanan nila.
Apan si Paduga hugtanong mihimakak nga may kalabutan siya sa krimen dihang gisukitsukit sa kapulisan. (EIM) - (BANAT NEWS)