CEBU, Philippines - Naangol ang usa ka 63 anyos nga drayber sa traysikol dihang gidunggab sa iyang mga silingan sa sitio Chokay sa barangay Gun-ob, dakbayan sa Lapulapu sa miaging gabii.
Ang biktima mao si Marcelo Camay Sumalinog, minyo, ug drayber sa traysikol nga nagpuyo sa maong dapit samtang ang mga suspetsado mao sila si Allan Inot, 29, ug Junjun Inot, 21, pulos silingan sa biktima.
Si PO1 Leije Vincent Gonzalve sa homicide section sa kapolisan sa maong dakbayan nga nahinabi sa Banat News miingon nga dugay na nga nagkabikil ang biktima ug ang mga suspetsado ug dihang nagkatagbo sila nagkasinukmatay nga misangko sa panaglalis.
Dihang miinit na ang lalis, milanit si Junjun sa iyang kutsilyo ug gidunggab sa nagkalainlaing bahin sa lawas ang biktima.
Dihang nahagba na ang biktima nga naligo sa iyang dugo misibat dayon ang duha ka mga suspetsado ug ang mga silingan na maoy mihatod niini ngadto sa Lapulapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Si PO1 Gonzalve miingon nga giandam na karon nila ang kasong attempted murder batok sa duha ka managsoon nga nakasibat ug karong Martes ilang gitakdang ipasaka ngadto sa buhatan sa piskalya. (BANAT NEWS)