CEBU, Philippines - Ang dakbayan sa Talisay peligro kaayo sa climate change, base sa gihimong pagtuon ni Huberto Zanoria sa Community Extension & Development Office sa Southwestern University.
Kini sa dihang nasuta ni Zanoria nga tungod sa climate change miuso karon ang pagpanahili sa yuta sa nagkalainlaing lugar sa nasud diin usa niini ang Talisay.
Gawas niini miuso usab ang pagbaha, huwaw, biodiversity loss, health risk ug uban pa, matud pa ni Zanoria.
Ang Central Philippines ilabi na sa rehiyon-7 natalang ikapito sa labing delikado nga rehiyon tungod sa pagsaka og usa ka metro nga tubig sa dagat nunot niining kausaban sa klima sa kalibotan karon.
Sumala sa report sa Department of Environment and Natural Resources (DENR) ang Talisay usa ka landslide prone area kon lugar nga humok og yuta nga dali rang manahili.
Sa vulnerable assessment ni Zanoria nasuta nga walo ka mga barangay sa Talisay ang natalang “high vulnerable” o delikado sa mga katalagman nga iya sa kinaiyahan.
Lima sa maong mga barangay mao ang San Roque, Tanke, Poblacion, Dumlog ug Biasong nga mga pulos coastal barangay o daplin sa dagat.
Ang laing tulo ka mga barangay mao ang Lagtang, Jaclupan ug Bulacao nga parehong duol sa sapa.
Ang mga duol sa dagat nga barangay daling masugamak sa dagkung bawod kay pipila lang ka mga bakhaw ang nagbarog sa maong mga lugar nga maoy mosagang unta sa mga bawod ug hangin. Gani sa nanglabay’ng tuig ubay-ubay na nga pamilya ang nawad-an og balay tungod kay gibanlas sa dagkung bawod.
Ang daplin usab sa kasapaan peligro kaayo sa baha ug lunop tungod sa padayong kinubkobay og bas ug graba
Gawas niini nagkadaghan ang mga nagtarok og mga balay sa tampi sa kasapaan nga halos wala nay kaagian ang tubig.
Sayo niini si Kongresista Eduardo Gullas miawhag sa mga opisyal sa siyudad sa pagpapabakwit sa mga nagpuyo sa tampi sa kasapaan ngadto sa mga relocation site sa siyudad aron malikay sila sa disgrasya.
Nasuta usab sa pagtuon nga ang labing naghatag og dakong peligro sa Talisay mao ang kawalay imbornal niini hinungdan nga dali ra kaayong lunopan ang mga kapatagan sa panahong mobusagak ang uwan. (/WC) (BANATNEWS)