CEBU, Philippines - Mihuboy ang nawong sa polis dihang nasabak kini sa bato gikan sa wala hiilhing kriminal samtang nagpatrolya siya uban sa kaubang polis didto sa Cebu South Coastal Road, habig sa barangay San Roque, dakbayan sa Talisay niadtong Biyernes sa gabii.
Ang biktima mao si PO2 Gerson Antiampo, 33, nadestino sa Cebu Provincial Police Office (CPPO).
Sa blotter sa Talisay City Police Station nasayran nga si Antiampo maoy nagmaneho sa patrol car nga nagtangag sa plakang SG-408 ug kauban niya sa maong higayon si Inspector Wilfredo Giducos.
Ang duha paingon nga mo -inspection sa Talisay City Police Office (TCPO) ug sa uban pang lugar sa siyudad.
Apan pag-abot nila duol na sa San Roque, kalit lang mitugpa ang bato sa walang aping sa biktima gikan sa wala hiiling tawo nga namato kanila.
Bisan kun mihuboy ang nawong sa biktima gianinaw pa nila ang lugar apan wala sila makakita og tawo nga kapasanginlang namato kanila.
Gituohan sa kapolisan sa Talisay nga posibleng mga estambay sa maong lugar ang namaregla og bato ug nataymingan lang ang biktima.
Sa pagkakaron padayon pang naniid ang kapolisan sa dakbayan aron pagtumbok sa namato.(/WC) (BANATNEWS)