CEBU, Philippines - Nagsakay na lang og habal-habal ang usa ka drayber sa taxi nga miadto sa buhatan sa kapolisan sa dakbayan sa Mandaue kinsa giilogan sa sakyanan human siya tulisa sa tulo ka tawo didto sa sitio Capasanan, barangay Casili, lungsod sa Consolacion sa miaging gabii.
Si SPO2 Joel Arcenal sa kapolisan sa Presinto 6 sa Mandaue City Police Office (MCPO) nga nagbase sa barangay Casili nga nahinabi sa Banat News miila sa biktima nga si Ruel Villacorta, 38, minyo, nga taga Highway 77 sa barangay Talamban, dakbayan sa Sugbo. Matud pa sa biktima nga naglumbay ang daghang pasahero sa miaging gabii sa dalan A. S. Fortuna sa barangay Banilad sa dakbayan sa Mandaue dihang human manaog ang usa ka pasahero nga iyang gihatod sa maong lugar, misakay kaniya ang tulo ka lalaki.
Unya gimandoan siya niini nga magpahatod ngadto sa barangay Casili dihang paghiabot nila sa usa ka awaaw nga lugar, usa sa pasahero nga naglingkod sa likod niya kalit nga mition og armas dungan ang pagdeklarar nga tulis. Ang laing pasahero nga iyang gikatupad maoy mikuha sa iyang kinitaan ug dayon gimandoan siya niini sa pagkanaog.
Dayon gipadagan sa maong mga tulisan ang iyang sakyanan ug gibiyaan siya sa maong lugar.
Maayo gani kay may habal-habal nga miagi nga maoy iyang gipara ug nagpahatod siya ngadto sa buhatan sa kapolisan. (BANAT NEWS)