CEBU, Philippines - Gipaabot nga hugopan sa minilyon ka mga debotos ug turista ang tinuig nga pagpahigayon sa Sinulog Grand Parade karung adlawa apan hangtud ning pagsulat sa balita wala pay klaro kung moanhi si Presidente Benigno Aquino III.
Hinuon una nang gipahibalo nga posibleng moanhi si Bise Presidente Jejomar Binay ug gipaabot nga may kauban kining mga politiko.
Ang executive director sa Sinulog Foundation Ricky Ballesteros nibutyag dihang nahinabi sa Banat News nga andam na ang tanan sa grand parade nga salmotan sa 50 ka mga dancing contingents diin 27 ang sa Free Interpretation ug 23 sa Sinulog Based Category.
Samtang sa Float 34 ka contingent, 27 sa puppeteers ug 24 sa Higante category.
Ang Sinulog Foundation una nang mipahibawo nga walay mga politiko nga tugotang makahatag og mensahe atol sa maong kalihukan diha sulod sa grandstand sa Cebu City Sports Center gawas lang kang Presidente Benigno Aquino III kun modayon kini og tambong.
Atol sa Sinulog sa milabay’ng tuig gihulagway nga moabot og tulo ka milyon ang misaksi sa Sinulog ug gipaabot nga mosaka pa karong adlawa.
Nunot niini ang Department of Health -7 pinaagi ni Dr. Expedito Medalle subling mipahimangno sa pagdala og mga payong, kawo ug uban pang klase sa pandong panagana kun mobunok ang uwan ug tubig kung init ang panahon. (BANATNEWS)