CEBU, Philippines - Gihulagway sa Task Force Commander sa Sinulog 2012 nga malinawon ug walay mga panghitabo atol sa fluvial procession ug solemn procession kagahapong adlawa ug giingong mas daghan kumparar sa milabay’ng tuig.
Apan bisan paman niini dunay natikyaob nga motorbanca nga may kolor puti ang katig nga gisakyan sa kapin napulo ka mga tawo nga nikuyog sa fluvial procession hinuon silang tanan naluwas dayon sa Philippine Coast Guard. Si Cebu Coast Guard Commander Rolando Punzalan mibutyag nga malinawon ug hapsay ang kinatibuk-ang kalihukan.
Samtang si Sr. Supt. Melvin Ramon Buenafe, hepe sa Cebu City Police Office ug maoy task force commander sa security sa Sinulog festival mapasalamaton kaayo sa katawhan.
Gibanabanang moabot ngadto sa 40 mil ka mga tawo ang nagpunsisok sa dakbayan sa Lapulapu ug Mandaue nga mas daghan karung tuiga ang misaksi sa galleon nga gisakyan sa balaan bata nga si Sr. Sto. Niño wala pay labot sa nagpaabot diha sa Cebu City.
Kagahapon sa hapon atol sa solemn procession malinawon ug miduyog sab ang panahon ug gibanabana ni Buenafe nga moabot sa 1.8 milyon ang nanguyog. Sukwahi sa milabay’ng tuig nga giuwan ug gibaha. Natapos kini sa alas-6 kapin sa hapon nga gisugdan ala-una sa hapon.
Gipangulohan ni Cebu Archbishop Jose Palma, mga Katolikong deboto nga bitbit ang mga kandila ug tagsa-tagsa nila ka imahe sa Sto.Niño ang miduyog sa tradisyonal ug labing daku nga prosesyon atol sa bisperas sa Pista Senyor nga gitapos sa usa ka pontifical mass nga gipangulohan ni Rev. Bishop John F. Du.
Sa sayu pa, usa usab ka tradisyonal nga re-enactment sa first mass ug labing unang bunyag ang gipahigayon sa alas-9 sa buntag didto gihapon sa Basilica. Karong adlawa, ang Solemnity Feast o adlaw sa kapistahan sa Senyor sugdan sa naandan nang mañanita Mass sa alas-4 sa kadlawon, sundan kini sa solemn pontifical mass nga saulogon ni Cebu Archbishop Palma sa alas-6 sa buntag.
Sila si Mayor Michael Rama ug Gob. Gwendolyn Garcia maoy nanakay sa galleon nga naghatud og balik sa Senyor Sto. Niño balik sa Basilica.
Si Fr. Rudy Bugna, overall chairman sa parish priest sa Basilica Minore del Sto. Niño mipadayag nga gibanabanang moabot usa ka gatus ka libo ang mga misimba nga doble sa 50 mil niadtong niaging tuig.
Matud ni Bugna bisan pa sa pag-usab usab sa panahon wala matarog ang pagtuo sa mga debotos sa Balaang Bata.
Ang kapolisan manghatag usab sila og leaflets sa mga tawo aron pahimangnoan sa ilang seguridad. Adunay 10 mil ka mga sakop sa PNP, Armed Forces of the Philippines (AFP), mga anti-crime volunteers ug mga auxiliary force, civilian volunteers ug mga criminology students ug mga kadete sa Reserve Officers Training Corps (ROTC) nga magbantay sa Sinulog grand parade. (Uban sa report nila ni Lemuel Maglinte, Darrel Carumba, Brenda Batuto, Romeo Limpangog/EIM) (BANATNEWS)