CEBU, Philippines - Ang kagamhanan sa dakbayan sa Talisay mopasundayag sa mga kalamboan sa siyudad atol sa kasaulogan sa 11th Charter Day niini ugma, Huwebes, Enero 12, 2012. Si Talisay City Administrator Richel Bacaltos sa pakighinabi sa Banat News kagahapon mibutyag nga ang maong kasaulogan buksan pinaagi sa usa ka Misa Konselebrada sa alas 8:00 sa buntag dayon sa alas 9:30 ipahigayon ang programa sa kasaulogan sa city hall ground.
Ang maong adlaw usa ka pista opisyal kon holiday sa dakbayan sa Talisay diin wala’y trabaho ug wala’y klase ang mga tulunghaang publiko ug pribado ingon man sirado ang mga establisamentong pangnegosyo.
Matud ni Bacaltos nga adunay ipahigayong photo exhibit kabahin sa mga kalamboan sa Talisay sa milabay’ng 11 ka tuig sukad sa pagkahimugso niining siyudad.
Ang maong mga kalamboan maglakip sa natad sa edukasyon, arti ug kultura, sports ug governance.
Gipasigarbo ni Bacaltos nga si Mayor Socrates Fernandez niining ulahi, napiling Outstanding mayor sa tibuok nasud tungod sa implementasyon niini sa mga social services. (BANAT NEWS)