CEBU, Philippines - Gipahibalo kagahapon ni Cebu City Police Office Director Melvin Ramon Buenafe nga magbutang sila og mga surveillance cameras sa kadalanan sa mga nag-unang agian sa Sinulog Grand Parade karong Enero 15.
Sumala pa ni Buenafe makita diha sa iyang buhatan ang sitwasyon sa gawas pinaagi niini. Aduna say walo ka public assistance centers aron dunay daling kadangpan ang mga tawo.
Gituohan nga magbaha ang mga gadgets sa maong adlaw gumikan kay Wi-fi zone ang tibuok rota sa parada nga gipaluyohan sa Philippine Long Distance Telephone.
Samtang ang Bureau of Fire Protection nakaalerto usab sa maong adlaw ug mipahimangno si Cebu City Fire Marshall Sr. Supt. Aderson Comar ngadto sa publiko nga kinahanglan nga sigurohong giibot ang ilang mga appliances ug uban pa nga mga de kuryente nga butang sa dili pa manglakaw aron malikayan ang sunog. (BANAT NEWS)