CEBU, Philippines - Ang lokal nga kagamhanan sa Consolacion mipahigayon dayun og clearing operation sa Cansaga River human awasi sa dakong baha sa miaging adlaw.
Si Consolacion Councilor Brando Cuizon maoy nanguna sa team nga mihinlo sa maong sapa uban ang mga sakop sa Emergency Rescue Unit sa barangay Casili diin tanang gapnod nga nasangit sa kadaplinan sa sapa ilang gipangkuha.
Kini aron wala’y makasabod sa buhagay sa tubig paingon ngadto sa dagat. Gikabalak-an ni konsehal Cuizon nga ang pagpunay unya og uwan base sa gibalita sa Philippine Atmospheric, Geophysical and Astronomical Services (PAG-ASA) mahimo na usab nga hinungdan sa laing pagbaha sa maong sapa busa milihok dayon sila sa paglimpyo niini.
Gitinguha ni Cuizon nga kaabagan ang ilang clearing operation og mga ekipo sama sa mga backhoe ug pay loader aron madali ang paglimpyo pinaagi sa pagsakwat mga sagbot ug mga gapnod nga napundo sa tubig dala sa dakong baha nga nasugamakan niini.
Ang Consolacion may duha lamang ka backhoe, apan ang usa niini gigamit sa pagsakwat sa mga bato ug yuta nga mitabon sa mga kadalanan ug kabalayan sa bukirang bahin sa lungsod samtang ang laing usa naguba na. Hinuon naglaraw si Mayor Teresa Alegado nga mangayo og ayuda sa kagamhanan sa lalawigan sa Sugbo basin nga makahuwam kini og mga heavy equipment nga sarang nilang magamit sa paghinlo sa mga sagbot sa ilang sapa. (BANATNEWS)