CEBU, Philippines - Patay ang usa ka lalaking hubog nga giingong nagmaoy ug misuway og dunggab sa usa ka ginang gamit ang tari sa manok apan naabtan sa mga polis ug napusilan dihang usa sa mga polis giingong gisuwayan niini og dunggab niadtong Disyembre 23.
Ang napusilan patay mao si Jose Ligario alyas Boyet, kinsa manariay og manok ug residente sa Hidden View sa barangay Bacayan sa dakbayan sa Sugbu human kini pusila ni PO2 Rodel Abejuela kinsa usa sa mga miresponde.
Usa ka Thelma Omboy, 49, residente sa maong lugar uban sa usa ka Cyril Matugas maoy unang gikatahong giatake sa suspek gamit ang iyang tari sa manok.
Sumala pa sa imbestigasyon sa grupo ni SPO4 Rey Cuyos sa Homicide Section si Omboy ug Matugas naglakaw padulong unta sa balay sa igsuon ni Omboy diha sa maong lugar dihang ilang nasugatan ang suspek nga daw nagsusapinday sa kahubog.
Dihang duol na si Ligario gikatahong kalit niining gihapsan sa gidalang bag si Matugas, si Matugas daling mikaratel og dagan ug diha-diha mikuha og usa ka tari ang suspek ug gidunggab si Omboy kinsa dali usab nga midagan palayo. Apan wala lung-i og gukod sa suspek si Omboy hangtud nga niabot ang mirespondeng mga polis sa Talamban police station nga sila si PO2 Abejuela, PO2 Joje Magdadar ug SPO4 Jeffrey Archival luwan sa patrolcar.
Matud pa nga si Abejuela nga naglingkod sa backseat sa patrolcar daling milayat ug gibabagan ang suspek kinsa mituyok sa ilang patrolcar apan imbes nga mopatuo giingong gihamagan niini sa iyang tari si Abejuela.
Si Abejuela sa kabalakang madunggaban sa tari daling mipusil sa suspek ug naigo kini sa dughan, tiyan ug walang pulso . Patay na kini pag-abot sa Emergency Rescue Unit Foundation.
Nakuha diha sa crime scene ang siyam pa ka mga tari, usa ka tari nga diha pa sa kamot ni Ligario ug usa ka cellphone. Samtang gitahan ni Abejuela ang iyang kalibre .38 revolver nga service firearm.
Kasong homicide ang gipasaka batok kang Abejuela sa Homicide Section ug ang piskalya na maoy padesisyunon kung makakita sila og rason aron ikiha ang maong polis sa iyang gibuhat. (BANATNEWS)