CEBU, Philippines - Naglaum si Arsobispo sa Sugbu Jose Palma nga mahimong usa ka inspirasyon sa tanang mga katolikong Sugbuanon ang pagtugot sa Santo Papa nga pag-canonize ni Blessed Pedro Calungsod aron sa dili madugay mahimo na kining Santos.
Niadtong Martes, gisangyaw sa Vatican nga usa si Calungsod sa mga napilian sa Santo Papa nga ipaubos sa proseso sa canonization aron mahimong usa sa mga Santos.
Atol sa press conference kagahapon diha sa Archbishop Palace, si Palma mipadayag sa iyang pagmaya sa pag-canonize ni Calungsod ug giisip niya kini nga usa ka mahinungdanong panghitabo sa Archdiocese sa Sugbo. Si Palma nagkanayon nga gipakita lang ni Calungsod nga dili imposible sa usa ka simpleng tawo nga mahimong Santos ug nanghinaut siya nga daghan pang mosunod ni Calungsod.
“This is a great encouragement to us.We are all called to a life in union with God and to be holy,” matud pang Palma.
Labing lig-ong milagro nga gibuhat ni Calungsod nahitabo niadtong tuig 2003 sa usa ka tambalanan dinhi sa Sugbo diin usa ka babayeng gideklarar nga ‘clinically dead’ sulod sa duha ka oras tungod sa sakit sa kasing-kasing ang nabuhi human mag-ampo ang iyang mga tagtungod ngadto ni Calungsod.
Ang 17-anyos nga katekista maisip nga usa ka martir human siya patya niadtong tuig 1672 atol sa usa ka missionary work didto sa Guam. Niadtong tuig 2000, gihimo siyang beato ni anhing Pope John Paul II.
Sa laing bahin, gipahibalo ni Palma nga sa Pebrero sunod tuig si Archbishop Emeritus Cardinal Vidal uban sa tanang mga Cardinal sa tibuok kalibutan ipatawag ngadto sa Vatican aron subling tun-an ang kinabuhi ni Calungsod.
Kun matakda na ang pagbayaw ni Calungsod isip Santos, gikompirmar ni Palma nga siya uban sa mga kaparian sa Sugbo ang motambong ug mosaksi didto sa Vatican. (BANATNEWS)