CEBU, Philippines - Nagplano ang hepe sa kapulisan sa dakbayan sa Sugbu nga si Sr. Supt. Melvin Ramon Buenafe nga ipaubos og seminar ang tanang mga operatiba batok tigpayuhot og ginadiling drugas.
Kini human migawas ang report nga mitaas ang porsiyento sa mga kaso diha sa korte nga gipang-dismiss tungod kay wa makatuman ang kapulisan sa proseso paghawid sa mga ebidensyang ilang nakuha atol sa anti-drug operations.
Gani sa miaging buwan gi-dismiss sa korte ang kaso sa usa ka tomboy nga giilang ‘drug queen’ sa barangay Mambaling nga nadakpan sa Criminal Investigation and Intelligence Branch (CIIB) ug karun City Intelligence Branch (CIB) sa Cebu City Police Office uban sa iyang kapuyong babaye niadtong tuig 2009 ug nakuhaan og mga dagkong putos sa gidudahang ang sulod shabu.
Matud ni Buenafe nga usahay dunay mga proseso nga dili masunod sa kapulisan kay walay mobarog nga saksi, walay naka-cover nga sakop sa media ug ang husto nga pagpreserba sa mga ebidensya atol sa operasyon.
Gawas niini, adunay mga gi-dismiss nga kaso kay ang arresting officers wala na mopakita sa hearings o kaha usbon na ang ilang nahaunang testimoniya.
Matud ni Buenafe iyang susihon ang mga susamang hinungdan tungod kay nagduda siyang ‘gidaog’ kini sa kwarta.
Planong himuon ni Buenafe ang seminar karung bulan sa Pebrero sa sunod tuig.(Rey B. Pasaporte/EIM) (BANAT)