CEBU, Philippines - Personal nga moadto si Gov. Gwendolyn Garcia sa mga gilunopan nga mga dapit sa Mindanao aron mohatud sa hinabang kauban ang pipila ka mayor sa lalawigan sa Sugbo.
Gawas sa mga hinabang, dad-on usab ni Garcia ang mga heavy equipment sa lalawigan nga motabang sa paglimpyo sa mga nangagusbat nga lugar.
Ang kagamhanan sa lalawigan sa Sugbo mohatag og tag P5 milyones sa mga dakbayan sa Iligan ug Cagayan de Oro City ug tag P1 milyon sa mga dakbayan sa Tanjay ug Dumaguete sa Negros Oriental.
“Ako mismo moadto didto sa paghatud sa atong financial assistance usab nga gikan sa province, kuyogan pud ko sa mga mayor nga gusto gyud sad sila mokuyog para mohatag sad sila directly sa ilang financial assistance from each of their towns and cities,” sumala pa ni Garcia.
Si Liloan Mayor Vincent Franco “Duke” Frasco, umagad ni Garcia, mipahibawo na sa iyang P200 mil nga hinabang alang sa dakbayan sa Cagayan de Oro.
Samtang giawhag usab ni Frasco ang iyang mga kawani nga mohatag usab og mga ginamit na nga mga sapot alang sa mga biktima sa baha. Matud pa ni Garcia nga si Asturias Mayor Allan Adlawan mohatag usab og P100 mil sa matag apektadong lugar pinaagi sa iyang calamity fund sa lungsod.
Ang lalawigan sa Sugbo nakahatud na og 100,000 ka botelyang tubig; 3,000 ka sakong bugas; mga habol; de latang pagkaon, noodles ug mga tambal sa nahisgutang mga lugar. Kapin sa dos milyones pesos ang nabayad sa lalawigan sa Sugbo alang sa sinakong bugas sa National Food Authority.
Nanawagan si Garcia sa ubang sektor nga mohatag usab sa ilang tabang aron iya kining mahatud human sa adlaw sa Pasko. (Gregg M. Rubio/EIM) (BANAT)