CEBU, Philippines - Napalgang patay sulod sa pansayan sa iyang gitrabahoan ang usa ka manager sa pribadong kompaniya kagahapon sa buntag diha sa barangay Apas siyudad sa Sugbu.
Si Winifred Mejares, 47, costumer engagement manager sa Trax Technology Incorporated Asia Pacific ug lumad nga taga Cavite patay nang napalgan sa iyang mga kaubang trabahante sulod sa pansayan nga naglingkod nalang sa bowl.
Ang mga sakop sa Emergency Rescue Unit Foundation (Eruf) personnel nga miresponde mideklarar kaniya nga zero-zero vital sign.
Subay sa pasiunang imbestigasyon sa Homicide Section pinangulohan ni SPO4 Rey Cuyos ala-una kagahapon sa kaadlawon nakit-an si Mejares gawas sa pansayan nga gahuwat nga mogawas iyang kaubang si Jade Egos nga migamit sa ilang pansayan.
Human niadto wala na igkita ang biktima hangtud kagahapon sa buntag ang upat niya ka mga kaubang trabahante nagsige og sangpit sa biktima apan wala na gyud kini mogawas sa pansayan.
Nakahukom sila nga ablihan kini apan sa ilang pagsusi patay na kini nga naglingkod sa bowl.
Si Cuyos mitug-an nga sa ilang nakuhang impormasyon kanunay lang mag- overtime sa iyang trabaho si Mejares sanglit atoa sa kaulohan ang pamilya niini.
Dunay pagdudang posibleng nahago kini og maayo ug giatake sa balatian sanglit walay nakitang timailhan ang kapulisan nga gipasipad-an kini sa laing tawo. Ang patay’ng lawas gitinguhang ipaawtopsiya aron mahibaw-an unsay hinungdan sa kamatayon niini.(Rey B. Pasaporte/EIM) (BANAT)