CEBU, Philippines - Gihingusgan sa kapulisan sa Central Visayas ang kampanya batok sa loose firearms gumikan kay daghang mga gun owners ang wala na mag-renew sa ilang mga lisensya diha sa buhatan sa Firearms Explosives Security Agency Guards and Supervision Section (Fesagss)-7 karung tuiga.
Sa press conference kagahapon si Supt. Rex Derilo, hepe sa FESAGSS-7 mibutyag nga kapin sa 20 mil ka armas ang mi-expire ang lisensya apan wala gi-renew gikan niadtong bulan sa Enero hangtud sa bulan sa Oktubre niining tuiga sa kinatibuk-ang Central Visayas.
Matud ni Derilo sa miaging tuig ug karung tuiga kapin lang sa 2 mil ka armas ang gipa-renew sa ilang buhatan.
Giklaro sa maong opisyal nga kun dili na i-renew sa mga tag-iya og armas kinahanglan i-turnover nalang ang mga armas sa mga police stations aron dili kini mag-atubang og kaso sa higayon nga ilahang rondahon ang ilang balay.
Nasayran ang mga tag-iya’g armas nga dunay lisensya ug ni-expired na ilaha kining gihatagan og unom ka bulan nga tagal hangtud nga ilaha kining ideklarar nga loose firearm.
Samtang si Sr. Supt. Louie Oppus, Deputy Regional Director for Operation (DRDO) sa Police Regional Office-7 nagkanayon nga iyahang gipadad-an og kopya sa listahan sa unrenewed firearms ang mga city ug provincial police directors aron adtuon ang mga tag-iya niini sa hepe sa mga police stations ug pahibaw-on nga ni-expired na ang lisensya sa ilang armas.
Giklaro ni Oppus nga molanat lang og 15 minutos ang pagproseso sa lisensyang mi-expire. - (BANAT NEWS)