CEBU, Philippines - Gipahibalo sa Archdiocesan sa Sugbo nga mamahimo nang mopahigayun og Simbang Gabi o “Misa De Gallo” sa mga shopping malls, apan depende kun mosugot ba niini ang parokya kun diin nahimutang ang maong establisimento.
Karong Biyernes mao ang labing unang adlaw sa siyam ka adlaw nga Simbang Gabi.
Kini ang gipadayag ni Msgr. Esteban Binghay, episcopal vicar Artsidiyosesis sa Sugbo nga di sama kaniadto mahimo nang makapahigayon og misa sulod sa mga dagkong malls.
Didto sa kaulohan, kasagarang mopahigayon og Misa De Gallo ang mga dagkung malls nga adunay kaugalingong kapilya.
“Sa panahon ni Archbishop Cardinal Vidal dili pwede, pero karon wala man gibawal ni Archbishop Palma, pero kinahanglan una gyud nga mananghid sa mga parokya kun musugot ba kay aduna man sab kitay mga simbahan,” matud pa ni Binghay.
Subli usab nga giklaro ni Binghay nga ang “Misa De Gallo” mao ang misa nga ipahigayun sa alas-4:00 sa kaadlawon ug dili ang misa nga mahitabo sa gabii.
“Kaadlawon gyud nang Misa De Gallo ug dili kanang inig ka gabii kay mao naman na ang naandan sukad pa kaniadto,” matud pa niya.
Sa laing bahin, si Binghay misalikway usab sa mga pagtuo sa kadaghanan kabahin sa pagkompleto sa siyam ka Simbang Gabii aron matuman ang ilang mga “wish.” Si Binghay namahayag nga dili kini ang angay isulod sa huna-huna sa mga Katoliko tungod kay ang tinuod nga kahulugan sa misa mao ang pagsaulog sa nagsingabot nga adlaw’ng natawhan ni Hesukristo.
“Dili wish, ang angay tan-awon nato mao ang grasya unya nga ihatag sa Ginoo nato sa sunod tuig,” pasabot pa ni Binghay. (BANAT NEWS)