CEBU, Philippines - Mamasko sa sulod sa bilanggoan sa kapolisan sa lungsod sa Cordova ang usa ka tawo nga nag-atubang og kaso nga 13 counts of estafa ug usa ka kaso nga illegal recruitment.
Ang suspetsado nga gibalhog sa bilanggoan mao si Luciano Manabat Aliganga, 34, taga sitio Matab-ang sa lungsod sa Cordova.
Si SPO1 Lurencio Wagwag sa Cordova Police Station nga nahinabi sa Banat News miingon nga si Aliganga ilang nadakpan didto sa Tuyan, dakbayan sa Naga alas-7 pasado ang takna sa miaging buntag. Dugang pa niya nga gipasakaan og kaso sa iyang mga silingan diha sa barangay Day-as ang suspek tungod sa pagdani kanila nga iyang pasudlon og trabaho ngadto sa gawas sa nasud.
Si Wagwag miingon nga nadala sa pagdani ni Aliganga ang iyang mga silingan sanglit ang unang grupo nahatagan man og kahigayonan sa paglarga ngadto sa nasud sa Amerika ug giingon atua na didto magtrabaho niining panahona.
Nagkadaghan ang nagtinguha nga motrabaho ngadto sa gawas sa nasud nga maoy hinungdan nga ang pipila sa iyang mga silingan sa sayo nga mga bulan ning tuiga mihangyo usab kang Aliganga nga matabangang makatrabaho sa Amerika.
Si Wagwag miingon nga nangolekta si Aliganga sa silingan og P20,000 ngadto sa P30, 000 ang matag usa kanilla alang sa pagproseso sa ilang mga papeles. Apan hangtud ning mga panahona wala pa gihapon sila makalarga. Gumikan niini midangop sila sa pagpasaka og kaso ngadto sa korte batok ni Aliganga ug dihang nalutsan kini og warrant of arrest mibiya kini sa ilang gipuy-an hangtud nga natultulan kini diha sa barangay Tuyan sa dakbayan sa Naga. (BANAT NEWS)