CEBU, Philippines - Gipusil patay ang usa ka lalaki nga napriso na kaniadto sa kasong pagpangawat gikan nakig-inom kini kauban sa iyang mga barkada sa reclamation area sa barangay Poblacion lungsod sa Carmen kagahapon sa alas 2:00 sa kaadlawon.
Ang biktima mao si Peter Paul Tambasakan, molupyo sa barangay Baring lungsod sa Carmen samtang padayon pang giila sa kapolisan ang mamumuno niini.
Matud ni PO2 Jeshrel Into, desk officer sa Carmen Police Station dihang nahinabi sa Banat News nga milakaw na ang biktima gikan sa pakig-inom ug nag-abay sa iyang bisekleta dihang kalit nga mipaka ang butobuto sa armas.
Naatol nga dunay mga tanod nga nagpatrolya ug daling miresponde ug nakit-an ang biktima nga nagbuy-od na.
Sa pag-responde sa mga polis kauban ang municipal health officer sa lungsod gideklarar nga patay na kini tungod sa samad pinusilan sa tuong bahin sa lawas agi sa wala matinong kalibre sa armas.
Wala pa matumbok ang motibo ug si kinsa ang mipatay sa biktima. (BANAT NEWS)