CEBU, Philippines - Pormal nang gipasaka sa mga residente sa Mahiga Creek sa siyudad sa Mandaue ang kasong Preliminary Injunction ug Temporary Restraining Order (TRO) batok ni Mayor Jonas Cortes aron pakgangon kini sa korte gikan sa pagdemolis kanila sa ilang gipuy-ang luna karon.
Kauban ni Mayor Cortes sa gipasakaan og kaso mao si Manlalaban Francisco Amit Jr., city consultant to the mayor on Housing, Emmanuel Arong, ang chairperson sa Housing and Urban Development Office ( HUDO) ug Dennis Lua nga maoy gitumbok nga tag-iya sa 6.5 ka ektaryang luna nga gitudlong relocation site nila.
Sumala sa kihante nga sila si Roberto Litaba, Josefina Caya, Jose Larsan ug Milagros Escoto nga maoy mirepresentar sa Sitio Rosal Neigborhood Association sa Banilad, Mandaue City nga niadtong bulan sa Enero ning tuiga si Mayor Cortes mipahibawo pinaagi ni Arong nga demolison ang 1, 200 ka mga pamilya sa Mahiga Creek nga naila nga molupyo sa Philcadan.
Uban sa pasalig nga hatagan sila og P 17 mil nga financial assistance alang sa ilang pagbalhin ngadto sa relocation site nga giingon nilang sanapan sa tubig dagat.
Apan napakyas sila sa gituohan nilang dawatonong cash kay wala man kini ihatag kanila kay gihimo man nga advance payment nila kang Lua, ang tag-iya sa relocation site.
Matud pa sa mga kihante nga misagunto sila sa kahiubos ilabi na niadtong nasayran nila nga ang nahisgotang relocation site usa ka timberland ug inalienable ug undisposable, buot ipasabot nga dili mahimong ibaligya sa goberno ang maong yuta, sumala kuno ni Anastacio Cabaljo sa DENR. (BANATNEWS)