CEBU, Philippines - Naggubot ang mga residente sa barangay Calamba kagahapon sa hapon dihang lima ka armadong lalaki ang nasigpatan sa sudlonon nga bahin sa maong lugar.
Sayo pa kagahapon sa hapon unang gialarma sa Motor Riding Units sa Special Weapons and Tactics (SWAT) alas-3 pasado sa hapon apan kalit lang nangahanaw sa maong dapit ang maong grupo apan nasigpatan sila pag-usab usa ka oras ang milabay diha sa sitio Meniolida.
Si PO2 Allan Caumeran sakop sa MRU nga nahinabi sa Banat News miingon nga naabtan nila ang lima ka armadong lalaki nga ang usa nagbitbit pa og .45 pistola apan nakabantay ug nag-iyahay og panagan paingon sa sudlonon nga bahin sa maong barangay.
Usa kanila nga si Napoleon Go Alda, 33, na-trap sa balay nga giabangan ug nakuhaan og .45 nga armas ug dugang usa ka shotgun may upat ka buhing bala, duha ka .22 magnum señorita nga may napulo ka buhing bala ug usa ka .38 revolver nga may laser lights ug lima ka buhing bala sa bungbong sa lawak niini.
Ang suspek gidala sa buhatan sa Investigation and Detective Management Branch (IDMB) sa Cebu City Police Office (CCPO).
Si Alda mitug-an nga nabilanggo siya sa Cebu City Jail niadtong tuig 2000 human siya nakapatay diha sa sitio Camia sa barangay Capitol Site. Nadala siya sa Muntinlupa pagka 2003 ug pagka 2006 nabalhin sa Iwahig Penal Colony ug nakagawas siya niadtong Nobiyembre 2008.
Gihimakak hinuon niini nga iyaha ang tanang armas nga nakuha sa kapulisan kay ang uban didto makuha sa pikas nga kwarto nga giabangan sa laing tawo. Wala sad siya makaila sa upat ka mga lalaking gigukod sa kapolisan.
Si Chief Insp. Bonifacio Garciano, hepe sa IDMB nagkanayon nga ilang susihon kung nalambigit sa gun for hire o mga tulisan ang grupo ni Alda.
Samtang usa ka armored van escort nga giilang si Jason Alkuino, 28, sakop sa Davao Security and Investigation Agency (DASIA) ang gidakop human ireklamo sa duha ka traffic enforcers nga silang Christopher Pardillo, 61, ug Dennis Rabago.
Sumala pa nga nakadasmag ang armored van nila Alkuino uban sa laing tulo ka mga gwardya ug bank teller sa sakyanan atubangan sa Mambaling Elementary School apan miinsister kining molahos sa ilang biyahe ug dihang gipugos sa mga enforcers nga tiwason ang sketch sa aksidente mienggansa kini sa iyang AK-47.
Pagbiya sa armored van mitawag sa Mobile Patrol Group (MPG) ug gidakop sa usa ka mall sa Tisa si Alkuino diin midiretso ang armored van.
Sulod sa police station, si Alkuino miesplikar nga gibiyaan nila ang lugar aron bantayan ang kwartang ilang gidala nga maoy ilang trabaho ug nangayo og pasaylo sa nahitabo. - BANAT NEWS