CEBU, Philippines - Usa ka 21-anyos nga dalaga sa barangay Tingob sa dakbayan sa Mandaue nga wala tagda sa ulitawong iyang ‘crush’ o naibgan ang nakahukom sa pagkatkat sa 70 ka tiil nga punoan sa gemilina alas-11 sa udto ug ngitngit na mikanaog human gidad-an og aerial ladder sa mga bombero.
Si PO1 Renato Canja sa kapolisan sa Presinto 4 nga nagbase sa barangay Casuntingan, dakbayan sa Mandaue nga nahinabi sa Banat News miingon nga ang maong babaye (pangalan gipugngan) makaduha na ka higayon nga gialarma sa ilang buhatan tungod gihapon sa eskandalo nga mokatkat og kahoy.
Niadtong Domingo sa buntag didto mosaka sa dakong punoan nga ipil-ipil nga nahimutang usab duol sa ilang panimalay.
Si FO2 Edgar Campo-amor sa Mandaue City Fire Department nga nahinabi sa Banat News miingon nga daghan na sa mga sakop sa pamilya ug mga silingan ingon man bombero ug mga polis nga misulay apan pakyas sa pagpakanaog kaniya.
Nanaog lang kini dihang miabot ang higala sa lalaking iyang gikaibgan miingon kaniya nga palung-agon kini kay makigdungan ang lalaking iyang gikaibgan og panihapon.
Pagkadungog niini sa pangalan sa gikaibgan wala kini maglangay ug mikanaog dayon butang nga nakapahugyaw sa mga tawong nanguryuso didto. Ang maong babaye dihang gikahinabi sa mga reporter miingon nga pwerte gyud niyang iboga sa maong truckboy (pangalan gipugngan) apan wala siya tagda niini. (BANATNEWS)