CEBU, Philippines - Maayong pagkapisat sa kalawasan sa usa ka babaye ug lalaki human sila malatayi sa usa ka 10-wheeler truck pasado alas-9 sa miaging gabii sa barangay Pakigne lungsod sa Minglanilla.
Ang mga biktima nailhan nga silang Christine Nadela, 27, molupyo sa maong barangay ug Niño Tecson Gerale, 25, molupyo sa barangay Tungkop.
Sa pakighinabi sa Banat News ni PO3 Alfredo Pagaling sa Minglanilla Police misaysay kini nga usa ka Isuzu Truck Carrier nga 10-wheeler nga gikan ning dakbayan padulong sa syudad sa Naga nga gimaneho ni Pafilo Roble, 55, molupyo sa barangay Poblacion lungsod sa Carmen ang nakaligis sa duha.
Sumala pa niini nga wala makabantay si Roble sa paglabang sa mga biktima diha sa dalan ug uwahi na kining nakahunong sanglit napasok na sila sa ilawom ug nalatayan sa ligid. Matud pa ni Pagaling nga gitabang pa unta ang mga biktima ug gidala sa Minglanilla District Hospital apan gideklarar kini nga dead on arrival. Midugang si Pagaling nga ang drayber sa maong truck boluntaryo nga mitahan sa iyang kaugalingon sa ilang estasyonan.
Kasong Reckless Imprudence Resulting to Homicide maoy kasong atubangon ni Roble diin kasamtangan kini nga nagtingkagol sa kasel sa Minglanilla Police. - BANAT NEWS