CEBU, Philippines - Mag-atubang og imbestigasyon ang tulo ka mga pulis ug ang hepe sa Medellin Police Station tungod sa giingong ilang pagbuhi sa maestrong ilang dinakpan atol sa saturation drive sa miaging semana didto sa Canhabagat lungsod sa Medellin.
Sigun sa spot report sa kapulisan sa Medellin nga nahidangat sa Operation Branch sa Cebu Provincial Police Office (CPPO) nga niadtong Huwebes sa miaging semana sa alas 8:50 mipahigayon og saturation drive sila si PO3 Bonifacio Asengue, PO1 Jose Donnie Inzo ug PO1 Louie Misa didto sa barangay Canhabagat.
Sumala pa sa report ang tulo ka mga pulis nanago sa katubhan daplin sa karsada dihang ilang nakita nga may nagpaingon nga usa ka motorsiklo ug pag-abot sa ilang tungod gipahunong nila kini ug gimanduan ni PO1 Inzo ang sakay niini nga nailang si Borgy Muñez Oplas, 23, nga ipaisa ang gisul-ob niini ug didto nakita sa mga pulis ang usa ka paketeng gidudahang shabu nga gipasalup-itan sa hawak sa basketball short.
Tungod niini gidakop nila si Oplas ug gitanggong aron kasohan og kalapasan sa 9165 article 2 section 5 kon transporting of illegal drugs ug gikustodiya ang kolor Blue Suzuki Raider nga motorsiklo.
Apan niadtong Lunes sa ala-una sa hapon si Oplas gibuhian tungod kay matud pa ang pagka-detain niini igo lang ‘for safe keeping.’
Subay sa blotter ‘he was release after verbal instruction of acting chief of police’ butang nga gikahibulong sa mismong direktor sa Cebu Provincial Police Office nga si Sr. Supt. Patrocinio Comendador.
Si Comendador mimando og fact finding investigation aron klaruhon kun unsay tinuod nga nahitabo ug kun nganong gibuhian si Oplas nga giingong usa diay ka maestro sa usa ka kolehiyo sa dakbayan sa Bogo.
Ang Banat News misuway unta pagkontak ni Chief Insp. Manuel Singson ang hepe sa Medellin Police Station apan di makontak ang cellphone niini.
Gimanduan usab ni Comendador si Singson nga moduso og incident report sa iyang buhatan aron iyang masuta kun duna bay nahimong kalapasan.
Si Misa nga nahinabi sa Banat News ug gikuhaan sa iyang reaksyon nagdumili sa pagtubag niini ug igo lang miingon nga ang hepe ra nila maoy makatubag niini samtang wala sila si Inzo ug Asengua sa police station atol sa pagtawag sa Banat News kanila aron kakuhaan og habig. - BANAT NEWS