CEBU, Philippines - Patay ang 22-anyos nga pag-umangkon sa kapitan sa barangay ug talandugon ang laing upat ka mga batan-on sa duha ka managlahing disgrasya sa motorsiklo sa managlahing lugar sa lungsod sa Sta. Fe sa isla sa Bantayan niadtong Miyerkules.
Ang unang aksidenti nahitabo sa barangay Okoy diin aksidenting nibangga sa puno-an sa kahoy daplin sa karsada ang motorsiklo nga gimaneho ni Christopher Reyco Cabrera,nga pag-umangkon ni kapitan Dorry Cabrera sa barangay Talisay.
Matud ni PO1 Antonio Rayco sa Sta. Fe Police Station dihang nahinabi sa Banat News si Cabrera padulong sa disko nunot sa nagsingabot nga kapistahan sa maong lugar apan pag-abot sa maong lugar nalahos kini sa punoan sa kahoy daplin sa dalan.
Matud pa ni Rayco posibleng nakainom si Cabrera ug wala makakontrolar sa manobela sa likuong dalan ug nalahos sa maong kahoy.
Gisuwayan pa unta og hatud sa Bantayan District Hospital sa lungsod sa Bantayan apan gideklarar nga dead on arrival tungod sa dakung kadaut sa ulo niini nga nabunal sa semento.
Samtang pagka alas 12:00 sa tungang gabii sa susamang adlaw nabangga usab ang motorsiklo nga gimaneho sa usa ka 17-anyos nga way lisensiya sa center island sa barangay Maricavan ug nangalabay apil na ang tulo niya ka angkas.
Ang seryosong naangol mao ang drayber sa motor nga Aura Kawasaki nga si Ronhnel Negri, 17, ug mga angkas nga sila si Renato Santillan, 30, Romar Amadeo ug Apo Tayo nga pulos taga Bantigue, Bantayan.
Matud ni Rayco gikan sa Bantayan ug paingon unta sa lungsod sa Sta Fe ang mga biktima. Nasuta nga walay lisensya si Negri ug pulos sila nakainom ug wala magsul-ob og helmet. (BANATNEWS)