CEBU, Philippines - Gihatagan lang og upat ka adlaw ang usa ka jail guard aron madakpan pagbalik ang pinirisong iyang gibantayan nga naka-eskapo atol sa hearing unta sa kaso niini diha sa lungsod sa Argao sa miaging adlaw kay kung dili hayan taktakon kini sa serbisyo.
Ang jail warden sa Cebu Provincial Detention and Rehabilitation Center nga si Algier Comendador mibutyag sa Banat News nga kinahanglang madakpan og balik ni Roel Gil si Jojo Gañolon.
Ang mga awtoridad padayon pa sa ilang hot pursuit operation sa bukirang bahin sa lungsod sa Argao ug Dalaguete diin gituohang nagtago si Gañolon.
Si Gañolon nag-atubang og kaso labot sa ilegal nga drugas ug nakigpinusilay sa kapolisan pipila na ka bulan ang nakalabay diin napatay ang iyang igsuon atol sa usa ka anti-illegal drugs operations.
Si Comendador miingon nga kun dili masikop pagbalik ni Gil si Gañolon sulod sa upat ka adlaw iyang isumiter ang spot report ngadto sa buhatan ni Gov. Gwendolyn Garcia.
Samtang si Capitol Security Consultant Sr. Supt. Cesar Veloso sa iyang bahin mibutyag nga adunay internal investigation nga gihimo ang ilang buhatan nga ilang isumiter ngadto sa Committee on Discipline and Investigation(CODI).
Matud pa ni Veloso nga morekomendar sila ngadto sa CODI og dismissal sa serbisyo batok kang Gil. Dunay pagdudang posibleng nabayran si Gil butang nga gihimakak sa jail warden niini.
Gikatahong adunay kakunsabong nagmotorsiklo nga nagpaabot kang Gañolon atol sa pag-eskapo niini ug nailhan na kini samtang narekober na usab ang motorsiklo.
Ug gihulagway ni Sr. Supt. Patrocinio Comendador ang direktor sa Cebu Provincial Police Office nga planado ang pag-eskapo ni Gañolon. (BANAT NEWS)