CEBU, Philippines - Naangol ang usa ka 60 anyos nga amahan human kini dunggaba sa hubog niyang anak didto sa barangay Mulaom, dakbayan sa Danao, sa miaging gabii.
Ang biktima mao si Emilio Guc-ong, samtang ang suspetsado mao si Cris Guc-ong, 30 , ulitawo, kaugalingong anak sa biktima nga pulos molupyo sa maong dapit.
Si SPO2 Ernesto Pepito sa kapolisan sa maong lungsod nga nahinabi sa Banat News miingon nga hubog nga nahiabot sa ilang balay ang suspek gikang milaag ug dihang gisita sa biktima nasuko kini hinungdan nga naglalis sila.
Kumo kay hubog dali kaayong misanting ang utok sa kasuko ug gumikan sa kalipong nakalimot siya nga iyang amahan ang iyang gikalalis ug way kukaluoy nga giluba kini sa iyang kutsilyo.
Gumikan kay haniti managang ang amahan, ang mga bukton niini maoy natusak ug nangahiwa sa kutsilyong gigamit aron unta sa pagpuo kaniya. Ang mga barangay tanod sa maong lugar maoy mipakgang sa maong pagpanunggab ug misikop sa suspetsado ug gidiretso kini pagbalhog sa prisohan.
Kasong parricide ang atubangong kaso sa suspetsado. (BANATNEWS)